CORROZET (1540)

Gilles Corrozet, Hecatomgraphie, Paris 1540, c. L.VI. b

Calomnie

A tort & par faictz indecentz

Deuant les iuges d'ignorance

Calumnie porte nuysance

Contre les iustes innocentz.

 

Apelles painctre excellent en ouurage,

Pour se venger d'aulcun vilain oultrage

Qui luy fut faict d'ung calumniateur

Fut d'ung tableau ingenieux facteur,

Premierement il painct comme rassis

vng iuge estant au tribunal assis,

Ayant au chief d'ung Asne les aureilles

A celles la du roy Mydas pareilles,

Deux conseillers il mit à ses costez,

Ausquelz tous bons iugements sont ostez,

L'ung Ignorace & l'aultre Souppecon,

Ayans de femme & l'habit & facon.

Deuant ce iuge ainsi accompaigné

Vient Calumnie au vis tant rechigné,

En la main dextre ayant la torche ardente,

Pour demonstrer sa fureur fouldroyante,

Et qu'elle estoit par enuie enflammée

Contre l'honneur, le bien, la renommée

D'ung pauvre humain qu'a force elle tenoit

Par les cheueulx, & ainsy le traynoit

Taschant oster à cest homme la vie.

Et deuant elle estoit debout Enuie,

Qui procuroit du iuge la sentence,

Mais derriere eulx cheminoit Repentence,

Et la suyvoit de bien loing Verité

Qui accusoit telle seuerité.