DIRCK VOLKERTSZOON COORNHERT, BATAVUS, IMAGINUM IMPRESSARUM CAELATOR: HUMANITAS VERSUS ICONOCLASTIAM, IN FIGURIS  Amstelodami, in Rijkmuseum Pretenkabinet custoditur imaginum impressarum corpus, cuius inscriptio est 'De corruptione cleri catholici sive de origine revolutionis et iconoclastiae'. Humanista batavus Dirck Volkertszoon Coorhert has duodecim imagines impressit inter annum 1572 et 1576, studia humanitatis, disputationes religiosas politicasque atque Reformatae aetatis tempestatem restituens. In scaenam prodeunt, tamquam in theatrum, figurae allegoricae sacrae et profanae: lupus sub specie agni, Seductio, Ignorantia, Androginus bellicosus, sed etiam aliqui viri illustres qui sexto decimo saeculo vixerunt, ut Erasmus et Luterus. Coornhert doctrina et eruditione clarus, adhuc arte impressoria obscurus est; verum, ipsius ratio iconographica pluris aestimanda videtur praesertim in his exquisitis tabulis allegoricis. Nam temporibus illis iconoclastiam describere idem valebat ac seditiosum esse: de qua re Coornhert non inscius, tamen temporis morumque crudelitati non serviebat sed humanitatis studiis imbutus, tolerantiae temperantiaeque sensum spiritum imaginibus impressis vulgabat. Tum ipse caelatura usus est non tantum ad lucrum faciendum quantum ad opiniones suas vulgandas (ut Erasmus magister fecerat), etiamsi libertas ipsa periculosa esset.